Psa 138 | KikGKY | STEP | Thaburi ya Daudi Wee Jehova, nĩngũkũgooca na ngoro yakwa yothe; ngũkũinĩra ngũgooce ngai iria ingĩ irĩ o ho.

Psalms 138

Ihooya rĩa Gũcookia Ngaatho

Thaburi ya Daudi

1 Wee Jehova, nĩngũkũgooca na ngoro yakwa yothe;
ngũkũinĩra ngũgooce ngai iria ingĩ irĩ o ho.
2 ^aNgũinamĩrĩra njerekeire hekarũ-inĩ yaku ĩrĩa nyamũre,
ngooce rĩĩtwa rĩaku,
nĩ ũndũ wa wendo waku na wĩhokeku waku,
nĩgũkorwo nĩũtũũgĩrĩtie rĩĩtwa rĩaku,
na ũgatũũgĩria kiugo gĩaku
makĩria ya maũndũ marĩa mangĩ mothe.
3 Hĩndĩ ĩrĩa ndagwĩtire, nĩwanjĩtĩkire;
wanyũmĩrĩirie na ũkĩnjĩkĩra hinya ngoro.

4 ^bWee Jehova-rĩ, athamaki othe a thĩ nĩmakũgoocage,
rĩrĩa maigua ciugo cia kanua gaku.
5 Nĩmaganage ũhoro wa njĩra cia Jehova,
nĩgũkorwo riiri wa Jehova nĩ mũnene.

6 ^cO na gũtũĩka Jehova arĩ igũrũ-rĩ,
nĩaroraga andũ arĩa enyiihia,
no arĩa etĩĩi akamenya ũhoro wao arĩ o kũraya.
7 ^dO na ingĩgerera mathĩĩna-inĩ,
Wee nĩũmenyagĩrĩra muoyo wakwa;
ũtambũrũkagia guoko gwaku ũgookĩrĩra marakara ma thũ ciakwa,
ũkaahonokia na guoko gwaku kwa ũrĩo.
8 ^eJehova nĩakahingia muoroto wake harĩ niĩ;
wendo waku, Wee Jehova, nĩ wa tene na tene;
nĩ ũndũ ũcio ndũgatiganĩrie wĩra wa moko maku.